صباح الخير ظهر الخير عصر الخير مسا الخير الي بدكم اياه الخير
اليوم جاي وجايبة موضوع جديد
تعال يما شوي فكر معي
عمرك فكرت تخطط لحياتك ولا ماشي عالسبهللة زي باقي العالم وحاطط راسك بين هالروس وقايل يا قطاع الروس
طيب خلينا ندردش انا واياك شوي
هلأ غمض عيونك وحط اغنية لأم كلثوم عشان تصحصحلي شوي وجيب مج نسكافيه
ول عليك ما اسرعك صرت جايبهم
المهم
تخيل معي انك بمدينة اول مرة بحياتك بتدخلها وبتشوفها وانت في ناس دلوك على مكان لازم توصلو
يمكن انت تكون شطور وتوصل المكان بساعة او ساعتين
ويمكن تتوه ويلتعن ابو فطاسك وانت تدور ويروح عليك اليوم كامل وانت مش لاقيه
بس لو انك استخدمت خريطة للمدينة الي حضرتك منورها بطلتك البهية ودرستها مزبوط اكيد رح توفر جهدك وتعبك ووقتك ورح تتريح من توتر الاعصاب الي صابك
صح كلامي ولا مش غلط؟؟
نرجع للموضوع وخليك مركز معي
هسا يما الحجة زريفة بتكول انو حياتنا متل هاي المدينة مليانة مطبات واشارات مرور وحوادث وفشل ودواوير ولفات وطلعات ونزلات
بس الاشي الي بختلف انو هالمرة ما معك حدا يعطيك خريطة ويقولك روح هناك وبتكون وصلت
اسباب هادا الاشي كتيرة
انو النقطة الي انت بدك توصلها بحياتك او هدفك بالحياة بيخلف من واحد للتاني يعني انت وابن جيرانكم محروس ما عندكم نفس الطموح والاهداف
يمكن انت هدفك تطلع دكتور وهو بدو يطلع ميكانيكي او سواق تكسي ويمكن العكس
كلو بتأثر حسب الظروف والاحداث الي بتمر حوالين كل شخص
عشان هيك كل واحد لازم يعمل خريطتو بنفسو بس بدك تتبع عدة اشياء عشان تضيق الدائرة اللي انت بتدور فيها على هدفك او نهاية الطريق الي بدك توصلو
مثلا عندك شرع بدك تتبعو وما تخالفو
ومبادئ بدك تحافظ عليها
وقيم تتمسك فيها
هسا ازا ما عملت هيك انت رح تكون فريسة سهلة غيرك يستعملك عشان يحققو هم مصالحهم وانت ولا عبالك وماشي وراهم ونسيت انت شو بدك
ورح تحققلهم حلامهم مش احلامك وبتلاقي الايام بتركض وانت لسا ما وصلت نص الطريق يابا
هسا السؤال الي بنطح نفسو شو هو التخطيط؟
تعال تعال تروحش مكان انا بقولك
هو انك تحط خطة لمواجهة احتمالات يمكن تصير معك بالمستقبل وتحقق الاهداف الي بدك توصللها
حاسة انك ما فهمت خلينا نعطيك اياها باسلوب تاني
هو انك ترسم الخريطة الي بدك تمشي عليها بحياتك وتحط المكان الي بدك توصلو بالنهاية طبعا سواء بالدنيا او بالاخرة
طيب كيف بدنا نخلي التخطيط ناجح؟
بدك تتاكد انو عقلك وروحك وجسدك بعملو مع بعض بشكل حلو وبلعبو سوا سوا
وكل وحدة بدك تخططلها لحالها
هلأ بالنسبة لروحك لازم تنمي قدراتها وتسمو فيها عن الحرام والشبهات وما تنساها وبدك كمان ترسملها اهداف بتتوافق مع تعاليمنا الدينية وقيم راقية هشا ازا انت عملت هيك
هيي بشكل توماتيكي يما توماتيكي رح تقود الجسد والعقل في اطر مرسومة
نيجي للاشي التاني وهو عقلك
بدك تنميه بالمعارف والقراءة وكمان توسع افاقو بأنك مثلا تسافر او تغلط مرة وتفتح التلفزيون مش على هيفا وهبي تفتحو على برنامج ثقافي تشوف فيه الحضارات التانية والعلوم
نيجي للاشي التالت الا وهو جسدك
هادا بتنميه بالرياضة والاكل الصحي يعني مش هلأ بس تخلص هادا الموضوع تروح عالتلاجة وتسلخلك 5 سندويشات جبنة صفرا وتروح تنام
ازا انت قدرت تنشّط هدول الاشياء التلاتة وتنميها رح تعمل كلها بشكل متكامل وطبعا انت المستفيد
